مرحوم يا شيخٍ رجح بالموازين

في رثاء الشيخ/ فلاح بن فيصل بن حشر رحمه الله:
الله لا يسقي ضحى يوم الاثنين
فيه الحزن عمّ الهياثم وأهلها
عزّيت أبوي وهلّ دمعه من العين
وإليا مسح دمعه تحدّر بدلها
على رفيق أيام وشهور وسنين
من فجعته دمعات عينه هملها
يخفي ويجحد عبرته والخبر شين
هذي الحياة اللي على الله عدلها
مرحوم يا شيخٍ رجح بالموازين
فلاح بن فيصل فعوله كملها
خلاّ الحياة لكل ربعه بساتين
من خلقته ذخر القبيلة وأملها
لا ضامت الحملة ظهور البعارين
قالوا فلاح بن حشر هو جملها
يمناه للمحتاج فالعسر واللين
وإن جاه مضهودٍ حموله نقلها
يعتق رقاب وينهي أمر المساجين
وكل الحمول الكايده يحتملها
ما خصّ فعل الطيب يم القحاطين
كل القبايل بالجمايل شملها
ندعي له الله يرحمه قولوا آمين
عساه في جنّات عدنٍ نزلها
عبدالله بن عبدالهادي بن راجس