عسى جنة الفردوس ملقى لابن سلوم

الإهداء إلى إخوة وأبناء أخي عبدالله السلوم رحمه الله
عسى جنة الفردوس.. ملقى.. لابن سلوم
ليامن نهار.. الحشر كلٍ خذا.. كتابه
بيومٍ.. يرد.. الدين للشاكي المظلوم
يفر الرجل.. من ضنوته.. واقرب أقرابه
فقدناك.. يالسلوم.. من يمنع المقسوم
صديق.. كبر قدره.. وطيبه مع أصحابه
جمع كل خصلة.. لو تثمّن رفيعة سوم
تسجل تحت ذكره.. ليا ناحت اطيابه
رحل وابتعد عنا.. وحنا عليه كضوم
ربوعه.. تشيل الغيض.. وجّله ومرتابه
لك الله.. يا رجل مع اهل.. الوفا.. محشوم
نبي شوفته.. والقبر دونه.. قفل بابه
بتبقا له.. الذكرى تدّون.. غلا ورسوم
ما دام.. القدر.. ما جاتني.. صدفة أسبابه
ابشهد وغيري.. شاهدٍ له.. كثير القوم
تجمّل بوقتٍ.. في طواريه.. متشابه
اخوي العزيز.. اللي جميله بروحي.. كوم
ولكن عزاي .. الموت لابد ابرضابه
لعل السحاب.. ليا تجمّع وجا.. مردوم
يهل المطر.. لين القبر ينبت اترابه
قبر جاك.. ضيفٍ غالٍ.. واسمه السلوم
رفيع الجناب.. اللي زرع.. طيب بأصحابه