كف العواطف

خلاص ابا ارحل عن ديارك ولاني مقيم
والطرقة اللي بلا عنوان خليتها
تليت عرق المشاعر ليه ما انت بكريم
علقت نفسي مع النسمات واشقيتها
لو ان لي قدرةٍ لامر بي النسيم
شجعت ساقي على هجرك وعنيتها
ذاك الخطا ساق عذري منك والله عليم
كسرت كف العواطف يوم مديتها
يا كبر ما شالت الدنيا بعين اليتيم
حزنٍ يضيِّق وسيع الكون لا اطريتها
والجرح لو ماتت جذوره بقى فالصميم
عرقة تشوفه عيونٍ رحت واعميتها
انا ونومي خصما والا انت ما انت بخصيم
همك عشيق الدموع اللي تباطيتها
لو زاد بي شوق نسيانك بقلبٍ غشيم
سجيت معك القدم بالشوق سجيتها
انا ادري اني على ميعاد صبح عقيم
شبيت ضوي على صورتك واوقيتها
حيرت ليل تكسر معه عهدٍ قديم
شكيت لو آخر حدوده تعديتها
هاجر سباتي بعينك قلت الم الهشيم
احرق واجدد جروحٍ منك خاويتها
والامر يا غايتي بيدين ربٍ عظيم
لو طاولتني حياتي معك وانهيتها
خلاص ابا ارحل عن ديارك ولاني مقيم
والطرقة اللي بلا عنوان خليتها