الدايم الله

كتبت هذه الأبيات مرثية في ابني عبدالله الذي توفي يوم الأحد 4/5/1423ه رحمه الله
فقدت طير تو ما صف له ريش
عساه يشفع لي بيوم القيامة
حبه بقلبي خدش القلب تخديش
عبدالله ابني ما عليه ملامه
على فراقه صار نومي تناويش
تطري عليه ضحكته وابتسامه
الدايم الله مابه انسان يعيش
كلن يبي يفنى وتفنى عظامه
ما عاش فيها الهاشمي صفوة قريش
الهادي المهدي رفيعٍ مقامه
والرابح اللي جاهز للمطاريش
معه زهاب ويحسن الله ختامه
دنياك تصفي يوم وايام تشويش
وايام توريك القهر والندامه
دنياك فيها الناس يومٍ معاطيش
ويومٍ بها المضمي يحقق مرامه
يا مغلي الدنيا غلاها على ويش
ازهد بها واعمل لدار الكرامه
خل العمل صالح ولا فيه تغشيش
الله يوفقنا طريق السلامه
وصلاة ربي عد ما سار من جيش
على النبي خير الكلام وختامه