كذبة العشاق

لهيب النار ما يطفى إذا زدته بشعلة نار
وانا ناري تواقد بي وعذرك ما يبردها
تحاول تستر الدعوى وزلاتك علي كبار
بشي شافته عيني وجاني من يوكدها
كشفتك بعد ما شفتك وصار اللي علينا صار
زمانك بين الخافي ولا يمديك تجحدها
تبين كل شي عندي قبل ما اكمل المشوار
واعيش بكذبة العشاق واسمعها وارددها
نهاية حبنا هذي وهذي حكمة الاقدار
الا يا خاين العشرة جروحي لا تجددها
خلاص انسى ليالينا واحرق باقي التذكار
ولا تنطق حروف اسمي ولا حتى تعددها
ولا يطري عليك اني اموت بغيبتك وانهار
تجارب دنيتي واجد وقلبي قد تعودها
أخيراً روح عن عيني ولا تكثر علي اعذار
تراها واصله عندي رجيتك لا تزودها