خيط حرير

إذا يدّن الديك من عليه يطلع النهار
وتنفلت من قبضة الشرق الحمامة أم الجناح
أم الجناح أبيض في لون قلب الصغار
آه يا حبيبتي يا أم خصلة مهفهفه
قلبي اللي مرعوش الأمان
لسه بيحلم بالرضا
والشمس كلمة طيبة وفيها الشفا
قلبي اللي كان قرَّب يموت..
لسه بيحلم بالبيوت..
زي الخرز
والدرب خيط..
حرير.. ولاضم كل حيط..
وفي كل دار بترش حَب الحُب غيط
يتنفس اللبلاب على الباب الكبير..
وبرضه ملضوم بالحرير.
يا أم العيون الدفيانين
لو تعرفي من فين سمار النيل؟ منين!!
إوعك تقولي الآن جوفه عب طين أسمر..
لإَن الشمس فوقه من سنين
لو تعرفي طول السنين
على شاب عريان البدن وبدراعاته المكشوفين
وانتي عنيكي اسمرّوا من شيل الحنين
ولإنهم متكحلين
بشيء حزين..
بشيء في كل عيون صحابي الطيبين
اللي ف عينيهم انتظار.
والليل جدار
إذا يدن الديك من عليه يطلع نهار
عبدالرحمن الأبنودي