خنين الهيل

يطري عليه كل ما هفهف النود
ذكراً يجدف هاجسي في بحرها
عبر الزمن مالي مسافات وحدود
صورة خيالي هاجسي ما ختصرها
كم سجة تسهج مع الفكر وتعود
وانا على المركا جلست انتظرها
واشف فنجال أشقر يبري الكود
ليا دارت الدله على من حضرها
وخالط خنين الهيل ريح أزرق العود
وانباج صدر الروح واقفا كدرها
وانا غرامي فج ماهوب محدود
وقناعتي مافيه حد حصرها
اسرج خيولي في رجا كل مقصود
وانظر بعيني لين يشبع نظرها
وارسم ملامح لوحة كلها ورود
في روضةٍ ما داسها ألا مطرها
بين الحقيقة والخيالات موجود
اجمع من اصداف المعاني دررها
ولا نيب اعرض كلمتي كل منقود
لاشك اعبر كلمتي واعتبرها
ولا اشك ادور منقع البيض فالسود
وامشي على سلم القبيلة واثرها
وانا على نفسي تعهدت بعهود
ما قدر ولو طال الزمان احتقرها
جبلت أنا نفسي على العز والجود
وامرتها بالطيب والله امرها
واسند على الله خالقي خير معبود
ماعبد هوى نفسي ولا عبد دهرها