فرصة فريدة

اللي تجي ما من وراها مقاصيد
اللي مصادرها العقول الرشيده
عز الله إنه ما لحقها مناقيد
الراي راشد والمصادر جويده
إن كان جاء في العلم نشده وترديد
هذا الطلب هذاه بيت القصيده
هذا الذي تشهد عليه الأجاويد
ترى السعادة والحياة السعيده
في طاعة اللي يبدي الخلق ويعيد
من يمهله ربي ليالي عديده
لا يحسب ان العمر من دون تحديد
عمر الفتى تراه فرصة فريده
ما كنها إلا فرصة القنص والصيد
يحط من زين العمل في رصيده
قدّام لا يلفي صدوق المواعيد
قدّام لا يثني على الرِجل قيده
ونصير له مثل الجمال المقاييد
في يوم ما ينفع عضيدٍ عضيده
كلٍ يدقق له حسابه على حيد
إما شقا والا حياةٍ جديده
ما بين وديان العسل والعناقيد
في جنةٍ من حظ صفوة عبيده
ما هيب من حظ العصاة المقاريد
لكن أبا اطلب واحدٍ ما يكيده
بأمره يجردني من الذنب تجريد
أطلع ولا علي سيّة وحيده
أخير ما حصلت واخير ما افيد
فراج وسيود الكرشمي - ساجر