همي.. وتطفيشي

يا موتري يا رفيقي في مطاريشي
اليوم انا وأنت والجوال طرّاشه
أما أول الليل وألا بالمغابيشي
ليا نام خطو الهبود ورافق فراشه
بنزٍ من المانيا شاريك بالكيشي
ثمنك من حر مالي دافعه كاشه
وانا مضريك بالمسرى تناتيشي
اللي على شذبة العرقوب معتاشه
صدقان وأحباب بقلوبٍ مغاشيشي
تضحك بحجانها وقلوب غشاشه
مماسك في عبلةٍ فيها المداغيشي
تسوى حياة البخيل وطاش ما طاشه
ونومك بجوٍ خلا ما فيه تشويشي
يسوى الفلل والقصور وغلة الباشه
ما حولك الاّ الطيور تنفّض الريشي
والرزق عند الولي والناس كماشه
وشربتك من فم صميل البدو تنعيشي
أخير من شربةٍ من كاسٍ أخشاشه
وخير من واحدٍ يلعب به الطيشي
ما بين لمع البروق ولمعة الشاشه
واللي يحاول على همي وتطفيشي
أطفّشه ونتقي له عظم وعراشه
قلة يحط السماء بيديه ويعيشي
الله ولا جلسةٍ في مجلس اللاشه
حتيش حتيش ثم حتيش حتيشي
لا هوب سيف الوليد ولا هو عكاشه