مغرورة

مبعد وشايم عن كثير الاماني
ما ياصله انسٍ ولا ياصله جان
محفوظ في جوف من الوقت عاني
يا كم طرق بابه من الناس خلان
والكل حلمه يرتوي من حناني
يسعى ولكن ما جنى غير خسران
ويحلم ولكن خافقي ما عصاني
باقي على عهد الموده والاحسان
يحفظك خلف اسياج حدب المحاني
تمطر شرايينه من الرقه امزان
تسقي عروقٍ مجدبات تعاني
اعطاك حبٍ ما يقدّر بالاثمان
واصبح لك ادروب وقصور ومواني
وقّف على ضلع المحبه على شان
تشوف وش غيّرت داخل كياني
ادخل تربّع وافرد الصدر وزدان
الله يهنيك بغلاي وحناني
وان كان فكرك يا منى الروح حيران
وقلبك طلب منّك شهود وضماني
قلّه ابد ما تنلقي بد الازمان
حسن ورجاحه عقل طيب وتفاني
ان قلت مغرورة ترى الامر سيان
كثير غيرك بالتكبّر دعاني
مغرورة اي بلاه مغرورة احيان
واشوف نفسي نابغة في زماني
- الشاعرة/ بارعة