غيم ومطر

ضحك احجاج الفجر والجو غيم ومطر
والخير ضافي ورحمة ربنا ضافية
الغيم يغسل يباس الأرض سطر سطر
وتطق باصباعها لأيامها الساقيه
أيام يا قربها للِّي يعيش ونطر
بيشوف من جوفها خبراتها لافيه
يشوف فستانها الأخضر محيط وقطر
يبي يزيّن مناكبها وهي غافيه
ازراره من الزبيدي والورود الفطر
ومن كل زوجٍ بهيج حكايةٍ دافيه
صناعة الله مهو شيءٍ فبالك خطر
يا راسم اللوحه اللِّي ماهي بوافيه
شف كيف زانت ملامحها وبشّت عطر
الوصل طب النفوس ويجلب العافيه
والهجر سم الكبود اللِّي فطرها فطر
من طاوله بعد صمته بَيّح الخافيه
عبره للإنسان يوم إنّه بصدّه بطر
ما يدري إن التسامح خصلةٍ شافيه
للوصل حاول تبادر لو طريقه خطر
لو كان مزروع شوك وخطوتك حافيه
والشعر ماهو مجرّد عجز يردف شطر
وأكبر من إنِّه يكون الوزن والقافيه