المستريب العيوف

لا الزمان الزمان ولا الظروف الظروف
زاد كمّ الكلام وقلّ نفع الكلام
يا نديمي دخيلك حان وقت النكوف
ودي اضوي مدار الصمت جنح الظلام
راس مالي نهم عشق الفكر للحروف
في مجالٍ عجز يشعل فتيل اهتمام
انت شايف وانا مبطي ظنوني تشوف
من تكلم عن الغايب يطوله ملام
عقب غيبة ملاذ المستريب العيوف
كل ما مر عامٍ قلت: يقطعك عام
زفرةٍ من جريحٍ بالتسامي شغوف
لا شفع له وفاه ولا غشاه العسام
آه لولا لزوم النفس بامر الوقوف
كان اخلّد شعورٍ حيّ عجل الولام
مع وصبها عسى بعض الملامح تطوف
تذكر اسمي متى هبت على الطيب شام
الله أعلم تزين او ما تزين الظروف
جوهر الصد مفتاح العزى والسلام
- إبراهيم العبداللطيف