لو مخايل وتصوير

محمد العبد العزيز العبيد الله

يا مرحبا ما رفرف العود والطير
باللي شهر مثل الصقر بالنفودي
سلام أحلى من ثمان الغنادير
اللي بهن سحر العيون امعقودي
ذكّرتني لا شك ما أحتاج تذكير
وأسهرت عيني بالعنا واللهودي
مضراب عينه مثل ضرب المسامير
لا شك انا دون الحبيب امحدودي
ودي بشوفه لو امخايل وتصوير
والشوق لمه كل يومٍ يزودي
لا حدر القذلة وفكّ الإزارير
غشاه مثل الليل فوق النهودي
أزلق وانا جالس وأشوف الطوابير
جندٍ عظيمٍ غير كل الجنودي
عزّي لمن راحت حياته مخاسير
طاح العمود وطاح سقف العمودي
سلّم عليه اعداد نبت النواوير
واعداد خلق الله وصرف النقودي
حبه بلينا به وحنا مصاغير
لما صبغ بقلوبنا والكبودي
لو فرقتنا عنه طول المشاوير
له بالضماير قومته والقعودي
الله يبدل عسر الأيام تيسير
ما شي على الله لو تعسّر يكودي
- عنيزة