لوحة

كل شي بهالدفتر بدا يزهمك
كنت انحيك ابي كود الوطيس يحمي
كنت اوخرك بالظاهر وانا اقدمك
كنت اقول لحياتي كشري وارزمي
ودي اشعر بحر النار في ميسمك
ودي اكتب قصيدة والشعور يهمي
وانت من سلك همي طحت كيف أنظمك
أي نعم يوم حبيتك وانا منعمي
كيف ما شفت نابك من ورا مبسمك
اصعد بسلمك.. لا.. خذ بعد سلمي
ما عطيتك وانا في ظني اكلمك
ما تندمت.. لا بالعكس كل ندمي
كيف انبهك للغلطه ولا أجزمك
كان مفروض ما يركد لهيب الرمي
كنت محتاج أزيد أجهلك لين أفهمك
وبالتعالي على الطعنة كسرت سهمي
وانت من شاف فهمك للنقا يرحمك
تطعن ايدك قلوب وبالنقا تحتمي
ذاك لو هي طعون الخلف ما تلزمك
واستحليت غيباتي وأكلت لحمي
ويوم غصيت باسمي قمت أكلت لحمك
والتقينا وشفتك بالخجل ترتمي
أتحداك تعلن توبتك وندمك
ما تكفر ذنوبك لو تبوس قدمي
ورغم هذا تركت الشاعر يعلمك
كيف تزعل.. وتقدر ما تخوض بطمي
ثابت وانفعال الطيش ما يحكمك
إبراهيم السمحان