بصيرة أعمى

كل شي بهالدفتر بدا يزهمك
كنت انحيك أبي كود الوطيس يحمي
كنت اوخرك بالظاهر وانا اقدمك
كنت اقول لحياتي كشري وارزمي
ودي أشعر بحر النار في ميسمك
ودي أكتب قصيده والشعور يهمي
وانت من سلك همي طحت كيف انظمك
أي نعم يوم حبيتك وانا منعمي
كيف ما شفت نابك من ورا مبسمك
اصعد بسلمك.. لا.. خذ بعد سلمي
ما عطيتك وانا في ظني اكلمك
ما تندمت .. لا بالعكس كل ندمي
كيف انبهك للغلطه ولا اجزمك
كان مفروض ما يركد لهيب الرمي
كنت محتاج ازيد اجهلك لين افهمك
وبالتعالي على الطعنه كسرت سهمي
وانت من شاف فهمك للنقا يرحمك
تطعن ايدك قلوب وبالنقا تحتمي
ذاك لو هي طعون الخلف ما تلزمك
واستحليت غيباتي واكلت لحمي
ويوم غصيت باسمي قمت اكلت لحمك
والتقينا وشفتك بالخجل ترتمي
آتحداك تعلن توبتك وندمك
ما تكفر ذنوبك لو تبوس قدمي
ورغم هذا تركت الشاعر يعلمك
كيف تزعل.. وتقدر ما تخوض بطمي
ثابت وإنفعال الطيش ما يحكمك
إبراهيم السمحان