أغلى وسام

لك يا بو فيصل عسى عمرك طويل
والقصايد والمشاعر والكلام
كان ما طوعتهن لاجلك.. بخيل
يا ملكنا تستحق أغلى وسام
حاكم عن شرع ربك ما تميل
تخدم البيتين لك عشرين عام
والوطن لاجله عملت المستحيل
اشهد انك باذل كل اهتمام
والتطور بالبلاد اكبر دليل
في قلوب الشعب لك عالي المقام
عايش بالخير والامن الظليل
الله انه يحفظك يا بن الكرام
متعب روحك لمقصدك النبيل
المواطن في ذراكم ما يضام
حاكمين بعد جيل بعد جيل
تابعين سيرة اللي يوم قام
بعد ما صبره على العدوان عيل
صبح المصمك يبي نشر السلام
واستعاد الملك بالسيف الصقيل
وبان نور الحق من عقب الظلام
وبالامان ارتاح رحال ونزيل
كان بين الناس فتنة وانقسام
من بعض ناوين يشفون الغليل
وكان واحدهم بليله ما ينام
وبالنهار يغير فوق ظهور خيل
وحين وحدها ابو تركي بالحسام
ساد الامن وصار له فعل جميل
وفقه ربي لتحقيق المرام
يوم صار الحب للبغضاء بديل
وحكموا بعده هل الخير الحشام
الرجال اللي على العايل تعيل
دام عز اهل الوفا والطيب.. دام
مكرمين الضيف مزبان الدخيل
يا ملكنا والسلام اجمل ختام
لك يا بو فيصل عسى عمر طويل
محمد بن سبيل