الكل يدعي لك

غرايبٍ تحمل معاني جميلة
عسفتها وأدعيتها حص محّار
عدلتها بالفكر عن كل ميله
مهداه للي شاع صيته بالاقطار
اللي زما نجمه على كل جيله
حرٍّ شهر من ماكر العز والكار
شلع بعيد ورام راس الطويلة
تعيش يا شبل الصواريم الأحرار
نسل الملوك اللي مورّخ فعيله
يشهد لهم ماض الجزيرة والأدوار
حامين دار العز عن كل عيله
من دونها فادوا مرخصين الأعمار
وأرخوا على الباغين حدبٍ صقيله
يقودهم ليث على الضد مغوار
صليب راي.. ولا يحايل بحيله
صغير سن وخاض غبات الأخطار
ورد حياض الموت..والله وكيله
عوّد لنجد بحزم ساطي وجبار
وله خضعت روس الفوارس ذليله
لم الشتات ورد للحكم اعتبار
حكم الشريعة ما تخيّر بديله
واستامنت به نجد من ظلم الأشرار
زال الفتن والمعضلات المهيله
وحّد قبايلها وعم الرضا ديار
حكم بعدل ويسّر الله سبيله
وخلّف حرار فيهم تقر الأنظار
خيرٍ على الصاحب وعز ونفيله
وللي تهقوى سيف صارم وبتار
يقص روس أهل العبث والرذيلة
مقدامهم فهد.. عن الدار والجار
كم رد كيد اللي يسوقه غليله
له شب نار الحرب وأعلن استنفار
عوقٍ لمن بالغدر شب الفتيله
كسر جيوش الظلم ثم أمّن الدار
والظالم الطاغي رجع بالفشيله
يالله تحفظه للوطن درع وستار
ويالله عسى سنين عمره طويله
واخوانه أعوانه هم العز الأخيار
أهل الوفا وأهل السخا والنفيله
يالله عساهم من طويلين الأعمار
هم ريفنا وقت السنين المحيله
وأعود لفتى الجود محمود الأذكار
شبل الفهد راعي الكرم والفضيله
يا معرب الجدين يا عزوة الدار
يا نادرٍ حاش الفخر والجميلة
يالهيلعي يالفرز يا وافي الأشبار
يا لفيصلي.. يا وايلي السليله
سموك على معزي ويا عنك من اختار
اسمك على الصنديد صادق دليله
يا أمير للخير أنت رمزٍ وتذكار
جودك على الإسلام ما به مثيله
يابو اليتامى ذخرهم.. نسل الأخيار
يا جابرٍ عثرات من باد حيله
يا خيّرٍ والخير به دوم مدرار
ترجي ثواب الله نهارك وليله
كريم نفس ووقفتك تجلا الأمرار
وتبرى كبودٍ من وهنها عليله
على الضعوف أرحم من الوالد البار
في برهم ما قد ذخرت الوسيلة
الكل يدعي لك صدق سر وجهار
وباحسانك الميزان يرجح مكيله
ما حطت بأفعالك سوى بعض الأذكار
والخافي أعظم ما ذكرنا قليله
مما بقلبي سيدي صغت الأشعار
وعما حوى الخاطر ذكرنا صميله
أم محمد - الرياض