جرح (ثاني)

الشيب داهمني وأنا توني شاب
من عاش جرح الحب لازم يعاني
إي والله إني صرت مخطر ومنصاب
وإني شكيت امْن الهوى جرح ثاني
من غاب ذاك وكل شيٍ معه غاب
أصبحت من بعده وحيد بزماني
وأرجي وصاله.. واحسب لشوفه إحساب
صرت أتمنى شوفته لو ثواني
صبري بعد فرقاه في مهجتي ذاب
والحزن من كل اتجاه احتواني
ما كل بابٍ ينقفل ينفتح باب
ولا فيه أحد غيره يهدد كياني
صارت حياتي كلها هَم.. وأتعاب
كيف الطريقة يوم سهمه رماني
الجرح زاده جرح.. والجرح ما طاب
الله يعين اللي به الحزن باني
أنا أشهد إن الحب ياناس غلاّب
ماني بناسي ذاك مهما نساني