شعارنا التوحيد (نخلة وسيفين)

والوقت ساعه والليالي قصيره
والليل هذا ذعذعاته رياحين
وأضفى على الشعب السعودي عبيره
وأهلين ياسمح المحيا وسهلين
وجيهنا من نور وجهك سفيره
لا يا بعد هاالعين هذي وهاالعين
حنا العيون وإنت نور البصيره
والحمدلله يا إمام المصلين
سلامتك رحمة، ونعمة، وخِيره
يا مرحبا ياعشق كل الملايين
أقولها لك: عن جموعٍ غفيره
عبدالله اللي لا نعق للوزا بين
لولب قفول المعضلات العسيره
سطام لطام العصاة المغلين
سهم المنايا في وجيه المغيره
يابو اليتامى والضعوف المساكين
يا راس مال الأرملة والفقيرة
حكيم تقرأ مبهمات العناوين
خصمك قبل لا يلتفت لك تديره
مارحت باكستان، والهند، والصين
الا رجعت وباالمحامل ذخيره
صقر العروبة والسعد لك جناحين
ولا تشبه الا أبوك صقر الجزيره
عبدالعزيز اللي على العسر واللين
أقام شرع الله وخط المسيره
وحّد بلاد المملكة معزى الدين
من عقب ماكانت عشيرة، عشيره
للعز روس وللزعامه سلاطين
وللحكم ساسه ولشؤنه خبيره
وللموت جند وللشهادة ميادين
وللدار حد، وللمناعير غِيره
وإنتم هل العوجا رجوم الشياطين
قبر المعادي إنتم وزمهريره
تاريخكم مجد وبطولات وسنين
سمع به أصقه وأبصرت به ضريره
غالين يا آل سعود بالحيل غالين
عند الكبير من العرب والصغيره
والصف واحد نرفض يكون صفين
والدين ما به غير الإسلام غيره
شعارنا التوحيد نخله وسيفين
ومن شذ عنا في جهنم مصيره
وخوارج العصر الدعاة المضلين
أهل الفتن والمحدثات الخطيره
حنا لهم يابن الرجال المسمين
حنا كعام المعتدي والكسيره
حنا جنود الدار أول وها الحين
وبأيمانكم حنا السيوف الشطيره
حنا عصاك لقطع روس الثعابين
وحنا زوال النملة المستطيره
يا وافي لشعبك لك الشعب وافين
وغلاك مثل الدم فينا مسيره
آمين قولوا: ياهل الدار آمين
يعيش أبومتعب ويزداد خيره
والعمر فرحه، واجتماع، ومحبين
وسلامتك رحمة ونعمة وخِيره
الشاعر - فيصل بن دخيل بن طواله