مرثية

مرثية في المرحوم مسعود بن محمد أبو ونده القحطاني رحمه الله وأسكنه فسيح جناته..
يا الله يالمعبود علام الآجال
يا عالم بالخافيه والبياني
ترحم عزيزٍ راح والعمر رحَّال
والوقت لو هو طال ما له أماني
عمر الفتى له يوم معلوم لو طال
دنيا الفنا بين العزاء والتهاني
مرحوم ياللي مات في شهر شوال
عشرين يومٍ عقب عيد ارمضاني
أنا أشهد أنه مات يا ناس رجال
رجال ماله في الرجاجيل ثاني
أبو سعد لو مات ذكره على البال
عز الرفيق وعز من جاه عاني
مسعود تضرب به على الطيب الأمثال
طيبه قبل ما هوب طيبه ثواني
القلب صافي ويتبهلل تبهلال
يفرح ليا جوه العرب والعواني
يضحك حجاج معرب العم والخال
عن موجبات الطيب ما هوب واني
مسعود أبو ونده ليا قال فعال
زان الزمان أو شان وجه الزماني
ما احد نقل عنه سواليف وأقوال
الدين فيه وفيه وصل وحناني
يالله عسى ملفاه في سدر واضلال
وانهار تجري تحت خضر الجناني
أخته - أم راشد (هلا بنت محمد أبو ونده القحطاني)