عز الله إنه من كبار الفقايد

لا لوم يا طرف بكا ما فقدنا
هلّي دموعك يا عيوني بزايد
هذا مجال الدمع هلن ودنا
علم قريته في سطور الجرايد
خلى دموعي فوق الأوجان ودنا
أبكي على شيخ وسيع البلايد
سهل الجناب وعز الأقصى والأدنا
حب الوفا له من كبار الفوايد
الى جاله المظيوم ما قال عدنا
لوه بعيد من صغار البدايد
يا قف معه ويقول هذا ولدنا
ويقضي لزمه لوه بالحيل كايد
ويروح منه معبي كل ردنا
عز الله انه من كبارالفقايد
يا ليت ربي في فهد ما لهدنا
هاتو قلم هاتو سجل القصايد
باكتب تعازي في فقيدة بلدنا
في شيخنا اللي راح ما هوب عايد
فهد ولد سلمان عنه ابتعدنا
للقايد اللي يقصده كل قايد
خادم بيوت الله سبة سعدنا
وعبدالله وسلطان اهل العوايد
عضود الفهد ساداتنا هم سندنا
ونايف سندهم في ليال الشدايد
للأمن عين ساهرة ليا رقدنا
وسلمان متعب كل خصم مكايد
ريف الضعوف اللي يقولون عطنا
يا ميرنا اللي ما يمد الزهايد
يفداه حي ما تنكد نكدنا
اقولها ودموع عيني جدايد
لولا الغلا يا سيدي ما نشدنا
يا مير لوه طراد خذنا الطرايد
ولوه ملاقا دولة ما قعدنا
لا شك ذا امر اللي له الكون عايد
اللي لتوحيده شهدنا وسجدنا
ياخذ ويعطي ما على الله كايد
بأمره تكون واذا اراد بدنا
وصلاة ربي كل ما هل جايد
على النبي ما هزة الريح لأدنا
ابراهيم بن راشد الكويبين