شيخة

من عقب علمٍ جَدَّد الحزن يا سعود
صبرك.. يثبت كل نفسٍ حزينه
يا سعود.. يا المحبوب.. يا منهل الجود
فرقا خواتي.. بالضماير دفينه
نبكي.. وما بالدمع.. من فقدهم فود
أم الفهد.. وجه السعد.. والرزينه
يا الله عساها بجنة الخلد.. يا سعود
وأم أحمد.. اللي من نصاها.. تعينه
سَبَّاقةٍ للخير.. والوصل محمود
تقيّه في طاعة الله ودينه
والناس.. لاهل الدّين شاهد.. ومشهود
القلب يشكي.. من لواهب حنينه
حبٍ لها بين المعاليق.. ممدود
يا نور عيني.. أنتي بنتٍ فطينه
وصبرك.. يا حصّه مع مزاياك معدود
وما انتيب يالمياء.. لحزنك رهينه
أدعو لها.. والخير بالصبر معقود
حوض المنايا.. كلنا واردينه
أقدار.. ما فيها من النقص.. والزود
وبك يا شروق الخير.. وفيك السكينه
وغلاك.. يا بهجة فؤادي.. بلا حدود
واخوانك اللي دينهم حافظينه
نفخر بهم.. والطيب مهوب مجحود
ويا جعل شيخه.. في جنان حسينه
بدار البقا.. تنعم برضوان.. وخلود
واقولها.. من قلب بَيَّح كنينه
كل صابر.. ما جور.. وبالخير موعود
نورة الشبيلي