أغلى اسم

هلا باللي لها قلبي يرفرف كنه الجنحان
هلا بأغلى اسم في هالزمن سمي به إنساني
هلا باللي ليا طلت.. كساها من الحيا سلطان
ليا منه سبقها عطرها غطرف.. وناداني
من البارح وانا ابحث للقصيد اللي نبت عنوان
واثر عنوانه انتي.. وانتي الموضوع والحاني
يثور الشوق في قلبي من اجلك كنه البركان
وازفه في بيوتي.. يم قلبك جيش فرساني
اجل! لو ما انتي الشمس باصباحي تظلم الاوطان!
لو ما كنتي الفرحة بقلبي.. كبرت احزاني!!
مناي اني اشوفك قدم عيني يا غصين البان
ولو بيدي عليك اغمض عيوني طول الازماني
عليك اغار غيره.. ما بعد قرّب مداها إنسان
سماها حب خالص.. وارضها عسجد ومرجاني
تراني يا حياتي فيك ميت من زمان كان
حياتي فيك مرهونة.. وقلبي فيك هيماني
ولا يذبحني الا رمش عينك لا هوى كسلان
مثل ما يهوي السيف المهند بين ضلعاني
غديتي مثل جم لا شربته ردني عطشان
وانا ناوي على شربه.. لو إن الغب يحداني
هلا بك عد مطلاع النفل في روضة الصمان
هلا بك عد ما تنبت "بجيله" غصن ريحاني