تصدقين أني أبد ما تصورت

أمر هالديرة ولا أمر بيتك
جيت وجلست أسبوع جنبك وسافرت
أبي أمرك للسلام ونسيتك
من يوم جيت أبي أجيك وتأخرت
ياليتني من يوم ما جيت جيتك
خجلت من نفسي بعد ما تذكرت
أني رجعت لديرتي ما التقيتك
وش كثر من روحي ندمت وتكدرت
قصرت في حقك كثر ما عطيتك
ماني كذا والظاهر أني تغيرت
معقول من بعد المحبة سليتك؟
كني بعرف إحساس نفسي تعثرت
مدري أبي غيرك أو أني بغيتك
لا اكون طبت ومن قيودك تحررت
لا بارك الله بي لكاني جفيتك
وإلا.. كبرت أو يمكن إني تكبرت
ورجيت بعدك من بعد ما رجيتك
ما كني اللي مع طيوفك تسامرت
وأقول لك من كل قلبي فديتك
من الفرح ياما على جيتك طرت
ولا احتريت أحدٍ كثر ما احتريتك
ياما بعطر دموع عينك تعطرت
وياما كتبتك بالقصيد وقريتك
وأنا ماني معذور ولا تعذرت
وش عذري إن سألتني لا لقيتك
بس الوكاد إني معك حيل قصرت
مريت هالديرة ولا جيت بيتك