صدر القصايد

جريت من صدر القصايد مية آه
كله من الفرقا وطول المسافه
وعشتك على باب الأمل والملاقاه
يارحلة الحبّ العفيف وعفافه
وناديت يوم الصوت وقت المناداه
كنّه سراب وكنّ سمعك يخافه
وأنت الوحيد اللي حياتي بليّاه
كسرة خواطر وانعزال وصلافه
دونك خويّي الهم وأخو المعاناه
والعمر ماحتى جنينا جفافه
كم لي وأنا لاحان وقت المباهاه
تطري جمال وريح عود ولطافه
واليوم لك عامين والثالث انخاه
لاينتهي والدمع ماهو حسافه
فالوصل يومني ادوّر على رضاه
وأصير في نهر المواصل ضفافه
وللي عليك ان ضاق يومه ترجاه
والصبر لا قاله مقام وضيافه
ويومٍ صبري فيك نوّخ مطاياه
وزولك من غيابه عجّز لايعافه !
ويوم انت مثل البير كلٍ يبي ماه
وإسم الغياب انسان مزعج وتافه
ولو مالغلا فالصدر عاتب بقاياه
ماجاتك الشرهه بغبّن وجلافه
ولاجيتلك والبيت لو تنشد رجاه
قالت من اللي بس عاشه وشافه
محتاجلك والشعر مما بعد جاه
لا تتعبه بالبعد وتصير آفه
شفني وأنا لاجيت عاشق مية آه
كله من الفرقا وطول المسافه
شاعر سعودي