مشاريه وأماني

الصمت يكفي ويشفي صدر راعيه
لاصار كل الحكي ماله معاني
والقلب ماعاد تعنيه المشاريه
والعين ماعاد تغريها الأماني
والخاطر العمس من يقدر يسليه
الناس وإلا الشعر وإلا الأغاني؟
ياكاتب الحزن في قلبي وقاريه
في نظرتي.. في انفعالي.. في حناني
ياليت حزني مجرد دمع وأبكيه
ماهوب عايش معي بين المحاني
ماهوب يظهر علي وأحاول أخفيه
وتصير نظرات حزني هي لساني
لو للسحايب سجن ياعبرة التيه
والله ماحبسك بخافقي ثواني
مدري ذكرني زمانٍ كنت ناسيه
مدري ذكرت الزمان اللي نساني
كنت أكره البحر وأخاف الغرق فيه
واليوم أحبه.. وأخاف من المواني
كنت أعشق الجاي بأحلامه وأمانيه
ياما بنيت بخيالي له مباني
ياما رجيت العطا من مدة يديه
حتى خذا كل شي وماعطاني
رشيد الدهام - شاعر سعودي