ما عاد

أبي حاجه ولا عاد أبي شي
بعد المفارق صار كل شي عادي
إن متّ ما تفرق وإذا عشت هي هي
أنا بوادي والسعادة بوادي
وظلمة فراقك حاصرت منبع الضي
لين استباحت حرمته في فؤادي
ومن شاف حالي قال لا ميت لا حي
ما غير أهوجس بك وأتمتم وأنادي
الهم زادي والتناهيد لي مي
بالله؟ وش رأيك بميي وزادي؟
أنا بدونك زرع ما عاد له ري
وأنا الغريب اللي نستني بلادي
صار الهجير بغيبتك يلطم الفي
ولفح السموم أودى بروح البرادي
وصدك وهجر إنك كوى خافقي كي
وأزريت أحقق في غيابك مرادي
ياوي يا عيني بعد رحت ياويْ
ما هي تشوف إلا السهر والسهادي
وناري بعد غيبتك ما تنجض الني
لا واهجادي منك لا واهجادي
وش لي قلي بعد ما رحت وش لي؟
والنار تترك من وراه الرمادي
ما عاد فيني حيل ,, واصبر ,, لو شوي
وابتخلى عن جميع المبادي
واسمع يا راع الصد بقولك شي
أرجع وأنا والله لأترك عنادي