نتعد بالملايين ... وفي الشدة مختلفين

اسمع معايا ومني ملحمة أحزان/ المسلمين والعرب للملحمة عنوان
شوف إيه جرى لهم وليه اتزلزل البنيان/ في الماضي كانوا قمم شهد التاريخ ليهم
مجد وبطوله وفدا... غيرة على الأوطان
ليه احنا واحنا يا ناس نتعد بالملايين/ أهل وجيران في الوطن إخوة كمان في الدين
الندهه لو في الجزاير بتسمع البحرين/ تجمعنا وحدة هدف أصل المصير واحد
لكن ويا للأسف في الشدة مختلفين
النوم جفاني وجف الجفن م الدمعة/ والليل طواني ولا نجمة ف سماه لامعه
أبكي بلا دمع... جف الجفن والشمعه/ والآه باقولها بطول الليل تجرحني
واقول يا دنيا ارحمي تقوللي مانيش سامْعَه
أبكي على القدس ولاّ على الشيشان/ ولاّ ضحايا كوسوفو ولاّ جنوب لبنان
ولاّ العراق الحبيبة ولاّ على الألبان/ ولاّ على اللي جرى في البوسنة وفلسطين
ولاّ علينا جميعاً ما المستخبي بان
يا أهل وطني وديني ليه رضينا العار/ داوو جراح الكرامة صونو الشرف والدار
ردوا على المعتدي خلّوا نفسكم نار/ بغداد جريحة بتبكي هِيَّه وفلسطين
واحنا ولا احنا هنا وشهيدنا ما له تار
يا مسلمين يا عرب اصحوا بقى م النوم/ فوقو وشوفو الدمار عالأمة ليه بيحوم
شوفو الهوان اللي مالي أرضنا بالكوم/ عيني على الدم نازل يكتب الآتي
"في كل يوم مدبحه... ولكل واحد يوم"
القاهرة - عبدالفتاح خاطر