تكفيه الإشارة

عند الإشارة..
طفل واقف..
يابس الآمال ، ما يعْرف خَضَاره..
لو تمسّه أي شرارة..
شبّت ب عجْزه حريقة!
جا يبيع الما..
وهو ما بلّ ريقه!!
جا ل عند إثنين في سيّارة من آااخر موديل..
كان ثالثهم (صخب صوت الأغاني)..
يرقصون..
أقبل وطق النافذة..
مرّت ثواني..
ما دروا به!
عاد وطق النافذة..
وانتبه له واحد ونبّه خويّه:
لا يفوتك ه الولد..
شف شكل ثوبه..
وسخ.. متشقق..
وشكله :
مزعج وغاوي أذيّة!
الخوي نزّل قزازه..
ثم صرخ زعلان.. قايل.. :
انقلع يالله هناااك!!
وخذ قواريرك معاك!!!
والتفت مستاء جداً :
ياخي ذولا شوّهوا معنى الحضارة!
وفْتحت خضرا الإشارة..
تْحرّكوا!
بس الطّفل واقف مكانه..
يابس الآمال مصفرّ ب مرارة!!