بالبلدي الفصيح .. تبغاها من جد .. تصير جدة «غير»!! 14

فكر إنو ولدك وحفيدك راحين يعيشوا في دي المدينة بعد مانروح إحنا، فكر في جدة إلى راح نتركها لهم .. ترى راحين يقولوا عننا كلام غير إللي كنا نقوله عن أهالينا رحمة الله عليهم بكل تأكيد .. راح يقولوا أجدادنا كانوا طماعين، كل واحد همه الأكبر أنو يحقق أكبر عائد على الاستثمار وعساها تضيق على الكل، راحين يقولوا كان فلان وفلان ماسك المنصب الفلاني وشوف إيش سوى فينا، راح يقولوا فين جدة إل حكتنا عنها جدتي!! تبغاها من جد تصير جدة.. خاف الله فيها وفي أهلها.. حط نفسك مكان الناس في كل تسويه، فكر في كام بليون بينصرف على الخدمات إل قاعدين ندمرها، لازم نتساعد مع إداراتها لأنو هادي مدينتنا إحنا ومسؤوليتنا أحنا، لو فكرت إنو جدة دي بيتك ساعتها أقسم لك إنو مستحيل يطلع شي غلط زي إل بنشوفه كل دقيقة دا.. وإن كان يرضيك إل صاير فلا حول ولا قوة إلا بالله.. ترى مالها غيرنا، وأصحى أبدا تفكر إنو في حل تاني .. إن الله لا يغير مابقوم حتى يغيروا ما بأنفسهم..