(الفراق الطويل)

يحضر الشعر مع حضور شاعره وشاعر المليون الشاعر الجميل محمد الوسمي والذي خص ( ملامح صبح ) بقصيدته (الفراق الطويل) ومع شكرنا له وابتهاجنا بحرصه والجميلين أمثاله من الشعراء المميزين..ندعوكم لمشاركتنا قراءته حيث يقول :
ما يفيد العتب كثر المشاريه = لاتعاتب على قل الكلافه
عاشقك لو يعرف العمر وشفيه = ماتشوفه جلس في ظل قافه
الفراق الطويل اللي بتحكيه = شفّتك قالته لي بإرتجافه
شيئٍ تخاف منّه .. لاتسويّه = سو شيئٍ تخاف انك تخافه
شاعرٍ كنت تنبت شعر بيديه = شوفه اليوم يكتب عن جفافه
ان بغى يوصلك ماعاد يمديه = وان بغى ينتظرك العمر طافه
مختلف .. لو يشابه من حواليه = مير ماضيّعه غير اختلافه
لو رحل عن عيونك .. لاتناديه = يا يخونك .. او يخون المسافه
رح .. وانا لو بعاف الدرب بمشيه = مجبر احيان تعشق ماتعافه
ايه احبك .. وحبك وين اوديّه = عن حنيني وهو لامر شافه
وابتدى حزني اللي بنتهي فيه = وانتهينا على قل الكلافه
حلمي اللي قضيت العمر اربيه =مات قدام عيني .. ياحسافه