قصيدة للشاعر سعيد بن مقبل الاكلبي

قال ودِّك بالقمر والا الثريّا؟
قلت ابي كل الكواكب والمجرّه
****
قال مادامك تحب الخير هيّا
علمنا وعْفاك والدعوا مبرّه
****
قلت هذي ماتبي فزعة حميّا
من سعى في شانها لله درّه
****
دامها في برْ سمحين المحيّا
ماذخرْنا دونها مثقال ذرّه
****
من يبادر والدينه بالكفيّا
مايواجه فالزمن مالا يسرّه
****
ومن يجازي والدينه بالجفيّا
مايعيّن في عياله من يبرِّه
****
ياخذ الديّان حقّه بالوفيّا
الجزا نفس العمل خيره وشرّه
****
عقِّب اللي لا بغوه يقوم عيّا
ماتذكّر فضلهم لو كان مرّه!
****
من بغى الجنّه فلا فيها ملَيّا
يحتزم بالصبر ويجوِّد مقَرّه
****
في رضاهم كل حاجه له تهيّا
مثل من حاز الكواكب والمجرّه
****
سعيد بن مقبل الاكلبي