(( نقطة مرور )) للشاعر مبارك بن حاضر

لا تشاكى الجرح يا عاشق و جرحك طهور
انتظر و تشوف بالعين دورات الحياه
والله إنّ الجرح صدّة طويلين الشبور
لا تغيّر غاليٍ و أنت ما تدري اش بلاه
إن سألته قال ابد ماحصل منّك قصور
و إن تركته ما قدرت اتجاهل ، من غلاه
ودي إنّه يشرح الحال و يوضّح الأمور
و إن حصل منّي خطا ما اتهاون في رضاه
لكن اقفى و اصبحت خوته ( نقطة مرور )
و ( التجاهل ) مايبيّن خطاي ولا خطاه
مرةٍ أقول من غالي الذنب مغفور
و مرةٍ أقول خيره عسى يقفي وراه
كان ودّه يقطع الوصل عادي و معذور
خوته ماهيب فرض ٍ علي مثل الصلاه
لكن أصعب شي قطع النبات من الجذور
بعد ما أثمر عز ، و الطِيب من جوده سقاه
خوة الطيّب ذهب و الذهب ماهو يبور
راس مال و ربح محفوظ في بنك الغناه
والخوي الكفو ثابت على مر العصور
لا تغيّره الليالي و لا يِلحق مداه
و أنت وافي يابيض الوجه يا نسل الصقور
و السؤال يسد عنه الجواب و ما حواه
مبارك بن حاضر