الخواجه ميرو والعم فيفا بيمسي !

لا مرة ولا مية ولا الف وتلتميه ( يمسيك بالخير يا حكيم ) ولا ولا مليون اللجنة الأولمبية الدولية والفيفا يرسلان كتابان ( الكويت ) يؤكدان من خلالهما بأنهما " لن يعترفان بأي اجراء أو قرار يتم اتخاذه بموجب احكام القوانين الرياضية التي تخالف الميثاق الاولمبي وقوانين الاتحادات الدولية المعنية .. من قبل هيئة حكومية او مجموعات مماثلة تدعى لجان موقتة او الكيانات التي عينت نفسها وتعمل خارج أو بالنيابة عن المنظمات الشرعية للحركة الاولمبية في الكويت والمعترف بها على نحو واف من قبل المنظمات الرياضية الدولية المعنية " .. الكلام ( لك يا جارة ) واضح كوضوح الشمس في رابعة النهار ( رجع .. عدل .. اسحب ) وماهو محتاج فلسفه وكثر كلام ورغي على الفاضي والمليان .. يعني يا احبتي ( اعقلوها وتوكلوا ) حطوا نقطة باخر كلام الكتابان وأبدوا اعملوا زي كتابا الخواجه ميرو والعم فيفا مايقولان ( رجع .. عدل .. اسحب ) !.. وعلى ما أظن ان طلبات السيادة واضحه ( رجعوا وإلا ) وهي تتلخص بإرجاع الوضع على ماهو عليه قبل أكتوبر 2015 .. زبدة الكلام لربعنا المتفذلكين ( يموتون باللف والدوران ) الجماعة ما في آذانهم ماء وهالكلام ماهو كلامهم بس بل كلام اي واحد عاقل ( العذر والسموحة ) عنده بعد نظر بهالقضية العويصة !.. ما تقولون لي اشفيها ان مشيتوا على كلامهم ( لو مره ) هل راح ينقص من اعماركم شي ؟.. او هل راح يتبخر شي من جيوبكم ؟.. الجواب لا وألف لا بس كل مافي الموضوع عناد بعناد ( ضيعتوا اجيال ) ولسان حالكم هم ليش يفرضون علينا وعلى الدولة قراراتهم ؟.. يا عيال الحلال ( عيل وغلط ) خلّصونا من هالمسلسل المكسيكي الممل اللي دمر رياضتنا لابارك الله بالعناد وأيامه وسنينه ( رجع .. عدل .. اسحب ) بس ماسكين لي سالفة الفيفا يناقض لوائحه ( غيروا هالاسطوانة ) !.. والله العظيم ما فيها شي ان تنازلتوا ( رجع .. عدل .. اسحب ) لمصلحة الشباب والرياضة بالكويت بل بالعكس راح تكبرون ( كثير ) بنظر متابع الشأن الرياضي بالكويت !.. والامر ما يحتاج غير قرار واحد وبس ( رجع .. عدل .. اسحب ) وعقبها اجمعوا رجالكم وأوردو الماء ( انتخابات جديدة ) ان كنتوا صاجيين دام عندكم أغلبية مثل ما تقولون ونصيحة لا تطولونها وهي سهلة الحل ( رجع .. عدل .. اسحب ) وسلامتكم .