«لوست» يودع «مامادو»

الأحد الجاي بإذن الكريم راح تكون ضربة قوية على روس جمهور ما حد داري عنه، جمهور ما تتخيلون قد ايش مخلصين ولا ييجي جمهور النصر عندهم شي، الاحد الجاي راح تكون لحظة حزينة على قلوبهم ويمكن من المتوقع «واحد يقلد الارصاد اللي يا حبهم للتوقعات» اقول من المتوقع ان فيه كثير من هالجماهير راح يهلونها عباري ويتعبرون بدموعهم لين يطلع فجر اليوم الثاني، ومن المتوقع ان يتخلل مشاهقهم عواصف رعدية، مصحوبة بزخات من البرد، ادري ودكم تعرفون من هم هالجمهور وانا مسوي فيها تشويق، اللي اقصدهم هم الجمهور اللي يتابع المسلسل الأمريكي «لوست» اللي بدهم يعرضونه ربعنا مدبلج باسم الضياع، قناة الإى بي سي الأمريكية اكتسحت العالم من ست سنين بهالمسلسل الأسبوعي اللي سحر امخاخ العالم «اتوقع مخوخ مو امخاخ»، حبكته غريبة، ما تدري اللي يكتبونه وش يحسون فيه، للحين فيه كم سر بالمسلسل من ست سنين الناس ودها تعرفه وينتظرون ان حلها يطلع باخر حلقة جمهور «لوست» بالسعودية غريبين عجيبين، فيه منهم من يتابعه كل اسبوع، وفيه منهم من ينتظر لين ينتهي «السيزن» ثم يمحط كل الحلقات ورا بعض، مسلسل مبتكر، لحسة مخ ما بعدها، مشكلة جمهور لوست انها ضايقة صدورهم، اشلون راح يتابعون مسلسل بعده؟ أنصحهم يتابعون «مامادو» في مسلسل بيني وبينك، فيه ملامح من الغابة وعشان يعرفون المصيبة اللي حنا فيها!