الأبو

بعض الأبهات أو الأبوان أو مدري كيف تنكتب بس المقصود الشخص اللي تقوله يبه «شرهتي على اللي علمك الشرح»، هذا الله يسلمكم هو المصنع اللي يصنع شخصية عياله، كثير من البزارين يطلعون مهزوزين الشخصية بسبب الأبو اللي كل يوم يدق في جدران عواطفهم لين قامت ترقل وأدنى نفحة هوى تطيحها، الأب للأسف عندنا ما يعلم عياله غير أنهم يخافون منه، ولا يحاول أنه يسأل نفسه لاجلس لحاله: هو أنا أبو كويس والا من جنبها؟، عايش طاير في هالدنيا وكن عياله تحصيل حاصل، بكيفهم اللي يبي يربي نفسه والا بقريح، بعض الأبوهات يصرف على نفسه وعلى تخبيصاته أكثر من اللي يصرفه على دروس عياله، والا على احتياجاتهم الضرورية، أكثر البزارين عندنا عندهم خوف من المجهول، لأن أبوهاتهم عقدوا حياتهم عليهم، ما فيه إلا قليل من الآباء اللي يجلس مع بزارينه ويبسط لهم الحياة، ويحسسهم أن كل شي بيد الله، مو لازم تضغطون على أعصابكم عشان تطلعون دكاترة والا مهندسين، صار لنا من عرفنا المدارس، وأبوهاتنا كلهم يضغطون علينا يبونا نطلع دكاترة ومهندسين ، شف وش قل الأطباء والمهندسين عشان تعرف أن السالفة ما لها دخل برغبة الأبو، وين الأبو اللي لاجت الامتحانات يأخذ إجازة ويجلس مع عياله، بالعكس فيه بزارين يتمنون أن أبوهم يكون برا البيت طول الوقت عشان يحسون أن جو البيت مريح!