نسبة «تفشل!»

ودي أذكركم بشي بس خايف اضيق صدوركم، تذكرون ايام مشاركة منتخبنا بكاس العالم اللي عطتنا فيها المانيا على روسنا ثمانية أجوال مع الرحمة، كان الفيفا مطلعين دراسة عن نسبة فوز كل منتخب بكاس العالم، وكانت نسبة منتخبنا بصراحة تفشل وتسود الوجه، قالوا ان نسبة فوزكم بكاس العالم يالسعوديين ما راح تتعدى واحد لخمس مية، أشوى انهم ما حطوا النسبة بالماينس، والا كان علوم، هذا وحنا متأهلين لكاس العالم كانت نسبتنا كذا، أجل وشلون هالايام وحنا الظاهر نبي لنا 20 سنة عشان نقدر نرجع نطق كورة بكاس العالم، شكل بلاتر ابو خدود مستقصدنا وناوي علينا، عشان خايف ان الكورة عندنا تتطور ونقوم نصقع البرازيل والارجنتين بالاربعة ونتصيد المانيا وندعي يا رب تيجي بمجموعتنا عشان نغسل ثارنا ونطقها بعشرة، ودي اتسلل بآخر ليل لمكاتب الفيفا المقفلة واطمر مع الشباك واقز اوراق الفيفا حقت ترتيب الدول عشان اشوف كم نسبة فوز منتخبنا بكاس العالم عقب هالدحدرة اللي ما بعدها ولا قبلها، أدري تقولون وش جاب طاري هالكلام، جابه الله يسلمكم تشكيلة بيسيرو الاخيرة حقت منتخبنا اللي واضح منها ان الدعوة ما زالت طقها والحقها وشدوا حيلكم يا شباب! ما ودي احلف انه ما جاب خبر دام الراتب ماشي!