السلاتيح

يمكن يا قاري يا عزيز ما تعرف وش معنى سلاتيح؟ السلاتيح سلمك الله هم ناس لا يهشون ولا ينشون ولا لهم أي قيمة، يعني مثل قلتهم، وسبحان الخالق دايم تلاقي هالناس اللي ما لهم قيمة يحاولون يسوون لهم قيمة حتى لو انها لا تودي ولا تجيب، يعني مثل هاللي تشوفونهم يطلعون بلقطات التلفزيون بالمباريات والا بعض المناسبات وهم ما لهم قيمة، وهذولا الناس نوعين إما أنهم مكيشين المخرج بمبلغ طفس ما يسوى عشان لقطة بثانية أو ثانيتين، أو إنهم أخويا المخرج أو يبي يتمصلح من وراهم، تابعوا بعض المباريات أو الحفلات أو المناسبات الرسمية، وانت جالس في أمان الله تتابع مناسبة منقولة وألا مسجلة بالتلفزيون شوي وتجي الكاميرا على وجه واحد ما تعرف من وين نط لك، وتشك إنك فريت القناة بس طبعا المخرج الطفس اللي يطلع خويه الطفس عارف إنه لو طول حاط الكاميرا على وجه خويه السلتوح راح ينكشفون مع مرور الأيام، المشكلة إن المخرج يفضح نفسه لأن فيه ناس أهم من خويه اللي ذبحنا فيه كل مناسبة وهو مطلعه على الشاشة، سبحان الله، تعدينا كل البشر باختراعنا للطفاسات والعلوم الناكسة اللي يخجل الواحد لا يسويها، والله عيب يا جماعة، عمل الإخراج أمانة وعليها راتب توكل عيالك منه، كيف تطلع شخص تافه ولا له قيمة بس عشانه خويك والا يدفع لك فلوس!