بلاوي المخدرات

صرنا دايم نقرأ بالجرايد عن مدمن مخدرات قتل ناس من أهله أو يهددهم بسلاح، والواحد ما يقول غير الحمد لله اللي عافانا مما ابتلى مدمنين المخدرات به، الله يرفع عنهم ولا يبلانا. المخدرات لعبت بالناس لعب، ولا تدري كيف الناس تطيح فيها، من اول الواحد لا جلس في المجلس وسولف سالفة مالها سنع وحس ان فيه كم واحد انقدوا عليه يغتم ويتضايق ويقعد سنة كاملة ما يحكي بالمجالس. كان الواحد خصيم نفسه، ما هو ضروري لازم اجرب كل شي عشان اطلع رجّال او حرمه راعي تجربه وخبره، مو شرط اخاوي دشير عشان اطلع شقردي واعرف علوم القبايل. اللي ما يتعظ من غيره هذا انسان راضي على نفسه يكون فار تجارب، مو لازم اصقع من هالبلاوي عشان اعجب اخوياي بالسفرة ويقول ما شاء على فلان شقردي بالسفر. لو تفر بس نص ساعة اخر الليل ببعض الاماكن في الخارج اللي يتصرمحون فيها الخليجيين كان تنسد نفسك وتعاف السفر وعلوم السفر وبلاويه، وش هالكيف الاقشر اللي يخليني لا رجعت البيت آخر الليل اعطي الوالد شلوتي والا اكمخ الوالدة بريموت التلفزيون والا اصحي ولدي الصغير بتطفية السيجارة بجبهته؟ يتمنى الواحد ان الله ياخذ امانته ويقصف عمره قبل لا يزل على امه والا ابوه بكلمة، عاد شلون يتطاول على والديه باليد او الرجل الله لا يبلانا؟ والله انه يوقف شعر راسك لو تفكر مجرد تفكير انك ممكن تضرب امك او ابوك، كيف عاد لا صحيت من البلا اللي زاعطه وتلاقي حالك بالسجن ويقولون لك تراك قتلت ابوك يوم كنت البارح مأجر طوابق مخك!