فلترة المخ!

اليوم لي نفس اطلع مواهبي في التفلسف والحكي، بزعم اني افهم واعرف انصح الواحد اشلون يطور ادواته مثلي مثل حقين دورات (أطلق المارد)، المارد اللي لا بد فيك ولازم تطلقه، يعني راح احكي اليوم سوالف زي سوالف اطلق المارد، من كم سنة انتشرت عندنا مثل هالدورات اللي ما كنا نسمع، ولا نعترف فيها، عشان كنا مريحين روسنا ومطنشين المارد ان شاء الله عنه مانطلق، التطنيش فن مو كل واحد يقدر عليه أو يفهم فيه، أحس انه علم ما له دفاتر ودروس، هالايام صايرين الناس يغرقون في شبر موية، أبسط مشكلة تخليه كاره حياته، لو خسر النادي اللي يشجعه بمباراة ديربي، نفسه تعاف الزاد (صب قهوة لعمك الشيخ صعفق) من بكرة اقدر اشتري خرقة مترين في متر واكتب عليها: مركز ابو العريف لإطلاق المارد والمخ اللي بداخلك، وما خلي احد يدرس الكورس قبل لا يكع اربع والا خمس الاف ريال، ما فيه شي مجانا، تبون تطلقون المارد بلاش، لا يا حبايبي يفتح الله، واللي ما معهوش ما يلزموش، وكلها كم دورة تدريبية وسلق حكي واصير من راعين الارصدة في البنوك ولا ضبطت لي كم عمارة، أغير النشاط، ولا تعرفوني ولا اعرفكم، ولا احد يحرجني لا شافني امشي بالشارع يجيني طاير يبي يسلم علي، فاك خشته ويقول لي: هلا بالخبير ابو العريف، تذكرني؟ أنا فلان اللي أخذت عندك دورة عشان اطلق المارد، وابشرك من عقب دروسك وانا متطور وحياتي تغيرت، ولو فكر هاللي تغيرت حياته يلقى ان سالفة المارد كلها خرط في خرط، المارد الحقيقي اللي لازم نطلقه هو كمية المخ في روسنا!