(جدوى) مين؟

بالله عليكم يا قراء، يتكرم واحد منكم يحط يده على جبهتي؛ لأني أحس أني ماني صاحي هاليومين، وبديت أشك إني ملخبط أو المجتمع هو اللي ملخبط، ولا عاد أعرف مين بالضبط اللي مش ملخبط، نسمع عن سوالف مشاريع ضخمة ببلدنا ونسمع عن سوالف دراسات جدوى أضخم وأضخم، يمكن يكون الواحد مسافر عن بلده سنين ولا يعرف وضع مجتمعه، لكن البلا اللي عمره لا راح ولاجا وعارف البير وغطاه، بالله عليكم اللي يسوون دراسات الجدوى من فين يجيبون الأرقام الدفيفية إذا كان ما فيه ولا رقم صحيح عندنا، وكل أرقامنا تلفيقية لزوم الشغل، عاد تصدقوا إن فيه دراسات جدوى ما تشدها غير بمبلغ فوق النص مليون، وإذا راجعتها زين تلاقيها مجرد جداول محطوط فيها التسعيرات، وإن طارت مرة تلاقي الرواتب وكل هالأرقام تقديرية، طبعا المشاريع الإعلامية أو الاجتماعية اللي تعتمد على معرفة شرايح المجتمع بالضبط والدقة هذي مشاريع يحطون لها دراسات من روسهم، يعني دراسات حسب تساهيل ربك، إن صابت زين على زين، وإن ما صابت ما راح يخسرون شي؛ لأن فلوس دراسة الجدوى حطوها بجيوبهم، يا عمي الدنيا أكثر ما فيها ماشي بالبركة، ما وقفت على دراسات الجدوى اللي هي أكثر من غيرها تجي زي ما تيجي، ولو طبقت دراسة جدوى وانكبت وراحت قروشك قابلني لو لقيت جهة تقدر تاخذ حقك.