فنانين ..مين؟

أعزائي فنانين المسلسلات والدراما والاسكتشات الكوميدية والدعايات.. بخصوص انكم تدخلون مناسبة خيرية مع بعض وماتطالعون في الناس.. جايين من كوكب ثاني مثلا؟
ياعمي تدري.. ماعلينا من طريقة دخلتهم، ان شا الله يدخلون دخلة مصارعين.. لكن وش حكاية هالغرور المستفز اللي يحسون فيه هذولي الناس، نفسي اعرف ليه الجمهور احيانا يصنع نماذج مضروبة يخليها قدوة له، ووش هي ردة فعله اذا جا وشاف الفنان الفلاني يتعامل بهالسماجة مع خليقة الله، ويسوي فيها انه الشي الوحيد المحترم والهاي كلاس في المكان اللي هو فيه!
ياجماعة انا ماعندي مشكلة مع واحد فنان وله تجربة ولو ان هذا مايبرر له رفعة الخشم على الناس، لكن نفسي افهم وش اللي يخلي كائن بشري مايتمتع باي موهبة في أي حاجة يشوف نفسه، ويناظر من ورا خشمه، واذا تكلم يحسسك انه متفضل عليك.. عسى ماشر يالحبيب!
الشرهة على اللي ينظمون مناسبات ويجمعون لك من هالفنانين بسبب وبدون سبب، وطبعا هم مايصدقون خبر تلاقيهم مرتزين ومستغلين الوضع لزوم التلميع والتميلح الاعلامي، وشوفوا ترانا نسوي اعمال انسانية، ياشيخ لو بحلف انك ماتدري وش عنوان المناسبة اللي انت جاي لها، لكن الله غالب!