العمر «مش بعزأه»!

فيه ناس يحبون يحطون حياتهم في مغامرة حتى لو ما يدرون وش عواقبها، هذولي من أهم صفاتهم انك تقدر تعرفهم لا صرت في ملاهي برا، ذيك الملاهي اللي ما تلعب فيها الا اذا كان فيك عرق من الزير سالم، كثير من الناس ما عنده مشكله انه ممكن لو صار فيه اقل خطأ انه يموت، زي ميتين القلوب اللي يسوون عمليات تجميل او ربط معدة عندنا، هذولا ودي اعرف وش يحسون فيه، يشوفون بالتليفزيونات ان الفنان الفلاني او الفنانة العلانية سوت عملية تجميل وصار جسمها زين ويبون يصيرون زيها، ناسين ان مستشفياتنا اللهم لك الحمد بس اسم مستشفيات على الفاضي، يدخلها الادمي صاحي يطلع منغولي من كثر ما يلعبون فيه، بصراحة اللي يسوي عمليات تجميل او عمليات تخفيف وزن عندنا هذا انسان يسمح لي اذا قلت له ما عنده سالفه، او انسان قوي قلب ومغامر، وليش اشغل اهلي ما يدرون ارجع لهم حي والا ميت عشان مو قادر اسوي رياضة شهر والا شهرين، حريمنا هاليومين مدهرات في عمليات ربط المعدة، وهن ما يدرن عنها شي، بس يسمعن انها تنحفهن وبس، يطامرن على عماها، ولا يسألن بعض وش العذاب اللي ممكن تعانيه الوحدة اللي تسوي عملية ويصير فيها لو خطأ بسيط راح تكره حياتها، على راي أخوانا المصريين: «العمر مش بعزأه» (مدري شلون تنكتب)!