ليه ما عزمتني؟

مرحلة متقدمة جدا من أساليب التعامل بين الناس أنك تربط علاقتك بشخص بعدد المناسبات العامة اللي يعزمك عليها، والمسألة بسيطة ومايبي لها تعب.. إذا حاب تحافظ على الصداقة كل اللي مطلوب منك أنك تبلغ البني آدم هذا بأي دعوة توصلك لأي مكان وأي حدث، وياويلك تعتقد أن فيه مناسبة غير مهمة..ياعمي إن شا الله تكون مؤتمر دراسة الفرق بين أسعار الخرفان ومواد البناء من وجهة نظر جغرافية..موب شغلك، انت اعزمه وهو يعرف يتصرف!
طبعا طول منت محافظ على هالتقليد الأصيل فأنت تعتبر صديق وفي وسنايدي ومافي منك وراح يحرص كل مرة يشوفك يقول لك انه يعزك لأسباب إنسانية نبيلة مالها دخل بمجال الشغل والمناسبات والبرستيج والكلام الفاضي هذا كله، لكن تعال في ليلة مافيها ضو قمر، واطلع مناسبة وخلي الأخ الكريم يدري انك رحت وماقلت له..أول إجراء راح يتخذ في حقك أنك تدخل البلاك ليست حقته، وثاني شي ماراح يجي طاريك في أي مكان إلا والأخ يقول محاضرات علمية عن أنك صديق غير كفو، وأنك تنكرت له مع أنه عمل فيك جمايل كثيرة!
احتياطا ياشباب.. تراني رايح بكرة معرض عن أنواع الصابون.. هذا انا علمتكم.. عشان لا أحد يقول إني زحلقته!