بطالة بفعل فاعل

اقدر أقول لكم بكل تأكيد ان مع صفوف العاطلين اللي واقفين ومعهم ملفات علاقي في مكتب العمل شاب سعودي معاه خبرة في مجال حيوي ومطلوب، وشهادة ماجستير من جامعة عالمية ويتقن الانجليزي والعربي والله العالم ان الألماني ما يعوق معه بعد، وفوق هذا معاه شهادات ودورات تدريبية يمديه يوزعها على كل اللي واقفين وراه وقدامه منتظرين الدور!
الولد طموح، خلص بكالوريوس واشتغل كم سنة وقال خليني اكمل دراسة برا عشان ارجع واشتغل براتب اعلى، كل زملاءه توظفوا..بما فيهم الناس اللي درجاتهم اقل منه لكن عندهم واسطات اكثر منه، راح لشغله الاول رفضوه لأنهم جابوا واحد اجنبي بربع تكاليفه، سمع ان المبتعث يلاقي الوظيفة تنتظره ويكتب الراتب اللي يبي، الحين مستعد يشتغل بالحد الأدنى، لكن ماهو ملاقي!
أقدر اقول لكم بكل تأكيد بعد ان هالشاب ما يعاني من أي مشاكل في الشكل ولا في المضمون وعنده روح عالية وقيادية تخليه يمسك اطلق إدارة ويطورها وينجحها، لكن للأسف.. ورغم كل هذا، مالقى اخونا في الله أي حل ثاني غير انه «يمسك» سرا، عشان ياخذ ورقة لشركة ويروح يقابل مديرها اللي معاه خامس ابتدائي ودورتين في الرسم وخبرة في الكيرم.. واللي راح يقول له للأسف.. محنا محتاجينك في الوقت الحالي.. لكن راح نتصل عليك.. طبعا موب لازم تعطينا رقمك!‬