صح عليك يالطارة!

يا شباب حلو الواحد يكون فنان في سواقة السيارة، يعني ممكن يكون عنده مهارة كيف يطلع من الزحمة، وكيف يلبق السيارة بحرفنة، وكيف يمشي بدون ما يسقط على أحد وبدون ما يتعامل مع الطريق على انه لعبة درايفر!
لكن تستغرب لما تشوف واحد مصفي الطبلون في نص حارة، والا داخل تقاطع كنه يعبر خط نهاية سباق، هذا غير الدخول الماشي مليون بين السيارات اللي ماشية في أمان الله أو على قولتهم «تخييط».. طيب معليش.. وخلونا من الكلام عن تعريض الناس للخطر لأن هذولي ما يهتمون فيه للأسف، لكن الحين وش الممتع في الموضوع لا صار الواحد فيهم سايق سيارته كنها صاروخ ويخليك تشك ألف مرة ان رخصته الله العالم مطلعها من ملاهي! ووين المهارة بالضبط في واحد يحط ناس بريئة وعائلات على بعد لحظات من حوادث فظيعة سببها أن حضرته حب يستعرض شوي ويخلي الشارع كله على كف عفريت عشان سعادته، ولعيون الكم مهايطي اللي راكبين معاه ويكبرون راسه بعبارات من نوع «صح عليك يالطارة»!
أنا صراحة اقترح نجمع كل هالنماذج من شوماخر التحلية المذكور أعلاه، ونرسلهم لفورمولا ون، ع الاقل نطلع منهم بفايدة ما دام عندنا أزمة انجازات هالفترة، وبالمرة نفتك منهم ونسوق سياراتنا براحة بال، لا درايفر ولا ستريت فايتر، ولا تخييط ولا تفصيل!