تسمعون بالمفاجآت!

عشان أوريكم أن عندنا ناس الله بالخير في الساحة الإعلامية، الحين فنان ومخرج بينهم مشكلة وحسابات شخصية وفنية، وعندهم شغلهم الخاص وهم ابخص فيه.. تجون انتم ياذا البرنامج الصباحي اللي ما عرفنا لكم، وتواجهونهم ببعض على الهوا، على بالكم مسوينها مفاجأة، وقال ايش اصلا كنا بنصالحهم! طيب معليش، يعني بتقلبونه برنامج اصلاح ذات البين مثلا، وبتسوون لكم جدول ضيوف متزاعلين خلال الشهر الجاي عشان تحلون مشاكلهم، بعدين وش هالنوايا الزينة اللي بالغصب.. الحين رجال عنده خلاف شخصي وموقف يمسه في شغله وهو تصرف على هالاساس؛ لأنه يعرف وش يبغى وكيف يتعامل، تجيبونه في الاستوديو وعلى بالكم سياسة الأمر الواقع تحطونه راس براس مع خصمه.. ولا تنسيق ولا حتى تلميح، ولا انتم دارين وش صاير بينهم اصلا.. مجرد حركات اكشن واثارة مالها لزمة، يا اخوان اذا ما عندكم أفكار أو مواضيع تهم الناس والمجتمع والخدمات علموني أنا بعطيكم لين تقولون بس، لكن شغل أن الواحد يسوي نفسه خفيف دم وفاعل خير بالقوة ومن صباح الله خير.. معليش قوية شوي، وفي الأخير لا تمت مصالحة ولا شيء.. الفنان ماهوب داري وش السالفة.. والمخرج طلع زعلان ويقول الشرهة ع اللي يجي لبرنامج سوابق في السماجة وفبركة المواضيع!