شاهد عيان من الشارع العام، على الأعمال الرمضانية ونجومها.. له وجهة نظره تجاه ماتابع من الأعمال وله رأيه الخاص بالطبع.. - بعد الفطور تشوف المسلسلات اللي تعرض في القنوات؟ بعضها مو كلها. - وش اللي تشوفه؟ أكيد طاش. - وغير طاش؟ أتابع هوامير الصحراء على قناة روتانا خليجية وبعد أشوف شيخ العرب همام وليلة عيد. - وش أكثر شي أعجبك؟ تبي الصدق شيخ العرب همام. - ليش؟ أحس أن الدراما المصرية رجعت بقوة هالسنه. - وش اللي خلاك تحكم عليها؟ انت ناظر أغلب القنوات الفضائية وشوف الزخم والأفكار الجديدة المطروحة ويكفي إن ام بي سي تعرض عملين مصريين وهي حلوة بعد. - وش هي العملين؟ عايزة اتجوز لهند صبري وزهرة وأزواجها الأربعة. - طيب أعمالنا السعودية وشرايك فيها؟ قلت لك بعضها حلو وأكثرها أقل من عادية. - وش الأعمال العادية من وجهة نظرك؟ مثل غشمشم وبيني وبينك هالعام والباقية أنا متأكد إنها تدور حول بعض. - يعني ما تتابع الأعمال السعودية؟ تقدر تقول كذا. - ليش؟ بصريح العبارة كلها زي بعض. - من الفنان السعودي المميز عندك؟ أكيد عبدالله السدحان وناصر القصبي وفيه غيرهم عندنا. - كل الفنانين الموجودين مو عاجبينك؟ فيهم ناس كويسين بس الأغلبية ماعندك أحد. - لو كنت منتجا من بتختار من الممثلين غير عبدالله وناصر؟ أكيد باختار من الخليج الأبطال ومن السعودية أدوار ثانوية. - ليش ما يكونون الأبطال من السعودية؟ عشان أبيهم يتعلمون كيف يمثلون زي الناس بدل من التكلف اللي هم فيه. - من يعجبك من الممثلين الخليجيين؟ عبدالعزيز جاسم، غانم الصالح وحياة الفهد ومسلسلها ليلة عيد روعة حتى أدائها تحس أنك أمام مشكلة حقيقية بعكس ربعنا. - وش فيهم ربعنا؟ ما يعرفون يمثلون تحس إن الواحد يقرأ من ورق قدامه ما يمثل صح. - كيفك مع البرامج؟ والله ما أتابع ولا برنامج أحسها دوخة راس وصراخ.
