اسعد التريلات!

احس والله العالم لو التريلات يسولفون ويعلمونا عن مشاعرهن، كان كل التريلات يحبون يعيشون عندنا، ماخذات راحتهن ع الاخر، يتمشن بنص المدينة باي وقت على كيفهن، ومدخل شرق الرياض من شافه يعرف العز والهنا اللي عايشات فيه التريلات، طبعا شرق الرياض اتوقع لو جوجل يلتفت له كان يسميه عاصمة التريلات في العالم، تتفرج على جميع انواع التريلات، شي طويل، طويل مزبرق، اللي شايله سيارات واللي شايله كراتين ما تدري وشي، تطوف التريلة وانت تسبرها بعيونك تدعي ربك ما يلف عليك والا يكون نايم ويعفسك انت وعايلتك- الله لا يقوله- بشرق الرياض تشوف التريلات يتساقطون كنهم غزلان ما شاء الله ماكنهم سيارات ثقيلة، وفي دول ثانية النظام يمنع منع بات ان التريلة تتجاوز او تمسك الطريق الايسر، يحلفون بعض الناس انهم اكثر من مرة شافوا راعي تريلة يطلع ورقة التأمين من الشباك يعني ويلك ياللي تعادينا يا ويلك ويلك، والكل ملاحظ عقب التأمين صاروا سواقين التريلات متهورين اكثر من اللازم، امس اتصفح الجرايد يا كثر حوادث التريلات كثراه، ومع هالصيف عد واغلط، وش همه سواق التريلة، اللي قبل كم يوم، اللي اصدموا فيه عايلة وماتوا كلهم، طلعه المرور من السجن، يقولون ما له ذنب، شلون ما له ذنب، اللي نعرفه لو طاح احد على سيارتك وانت نايم ببيتكم ومات، تتحمل جزء من المسؤولية، ليتني تريلة اطامر على كيفي!