انبسط يا مواطن!

امس القريب، يعني قبل كم ساعة مو مبطي، اصدرت وزارة التجارة الله يوفقها ويقوي قلوبها على التجار، تشكيل ثلاث لجان لمراقبة الأسعار،لا مو بس كذا، راح تصدر كمان لستة تحدد فيها اسعار جميع سلع رمضان ، وش هالهنا اللي حنا فيه، لجان تفتيش على التجار لا يزيدون الاسعار وتحديد اسعار، كل هذا مرة واحده، ياسلام، ودي ان بجنبي كم مواطن عشان نتطامر من الفرح ونجيب فوزفزيلا وننفخ فيها من الوناسة، يعني خلاص نروح السوق وحنا متطمنين ان ورانا احد يدقق على التجار لا يلهطون رواتبنا وحنا نشوف، طبعا داري ان فيكم كم واحد وهو يقرا كلامي مد لسانه وقال :خرطي غن يا بو العريف يا ليل ما طولك، ما أخفيكم اني ودي امد لساني معكم لاني مو متصامل حقين التجاره وقراراتهم ، يا اخي فيهم حنية زيادة على التجار، ويطالعون للمواطن بنص عين، بس شكلهم عورتهم قلوبهم وكسرنا خواطرهم وقالوا نبي هالمرة نساعد الاخ المسكين المواطن، ترى احلى ما بالوزارة لاحن قلبها على المواطن وترك الموظفين حقينها جلسة المكيفات وحسوا ان فيه مواطن ذنبه برقبتهم، عاد ما نبي هاللجان زي كثير من لجان ربعنا نسمع فيها ولانشوفها، صدقوني اول ما تعاقبون او تفتشون بسوق راح ينتشر الخبر بين الاسواق الباقية ويهجدون، من زمان منتظرين منكم هالوقفة، بس يالله مافات شي، راح نص اعمارنا وباقي نص، ودنا ما يروح كله في بطون تجارنا اللي اكلونا للعضم!